Gujarat Rain: છેલ્લા ત્રણ દિવસથી રાજ્યમાં વરસાદ પડવાની માત્રા અને વિસ્તારમાં મોટો ઘટાડો જોવા મળ્યો છે. છેલ્લા 24 કલાકમાં વરસાદના આંકડાની વાત કરીએ તો 13 તાલુકા સિવાય આખું ગુજરાત કોરું ધાકોર રહ્યું છે
ગુજરાતમાં જુલાઈ મહિનો અડધો થયો છે ત્યારે ચોમાસાની ગતિમાં પણ ઘટાડો જોવા મળ્યો છે. એવું લાગે છે કે ગુજરાતમાં વરસાદે મોટો વિરામ લીધો છે. મેઘરાજા આરામ મોડ ઉપર જતા રહ્યા છે. કારણ કે છેલ્લા ત્રણ દિવસથી રાજ્યમાં વરસાદ પડવાની માત્રા અને વિસ્તારમાં મોટો ઘટાડો જોવા મળ્યો છે. છેલ્લા 24 કલાકમાં વરસાદના આંકડાની વાત કરીએ તો 13 તાલુકા સિવાય આખું ગુજરાત કોરું ધાકોર રહ્યું છે.
સ્ટેટ ઈમરજન્સી ઓપરેશન સેન્ટર ગાંધીનગર દ્વારા જાહેર કરેલા વરસાદના આંકડા પ્રમાણે આજે 16 જુલાઈ 2025, સવારે 6 વાગ્યાથી 17 જુલાઈ સવારે 6 વાગ્યાના 24 કલાકના સમયગાળામાં રાજ્યના 13 તાલુકામાં વરસાદ પડ્યો હતો. જેમાં સૌથી વધારે સુરેન્દ્રનગર જિલ્લાના વઢવાણ તાલુકામાં 1.18 ઈંચ વરસાદ નોંધાયો.
SEOC દ્વારા આપેલા વરસાદના આંકડા પ્રમાણે ગુજરાતમાં છેલ્લા 24 કલાકમાં 13 તાલુકામાં વરસાદ નોંધાયો છે. એમાં પણ એક જ તાલુકામાં એક ઈંચ કરતા વધારે વરસાદ નોંધાયો છે. જ્યારે સુરેન્દ્રનગરના થાનગઢમાં 0.67 ઈંચ વરસાદ નોંધાયો હતો. આ સિવાય બાકીના તાલુકામાં પુરો અડધો ઈંચ પણ વરસાદ પડ્યો નથી. આ 13 તાલુકા સિવાય આખું ગુજરાત કોરું ધાકોર રહ્યું હતું.
હવામાન વિભાગ પ્રમાણે આજે ઉત્તર ગુજરાતના બનાસકાંઠા, પાટણ, મહેસાણા, સાબરકાંઠા, અરવલ્લી તેમજ મધ્ય ગુજરાતના ગાંધીનગર, અમદાવાદ, આણંદ, પંચમહાલ, દાહોદ અને મહિસાગરમાં ગાજવીજ સાથે હળવાથી મધ્યમ વરસાદ પડશે.
