ICC T20I No.1 Batter: ભારતીય ક્રિકેટ ઈતિહાસમાં ઘણા મોટા નામો રહ્યા છે, જેમણે દેશને ગૌરવ અપાવ્યું છે. હાલમાં જ યુવા ખેલાડી અભિષેક શર્માએ T20 આંતરરાષ્ટ્રીય ક્રિકેટમાં જે કીર્તિમાન સર્જ્યો છે, તે આજે દરેક ક્રિકેટપ્રેમી માટે ગર્વની વાત છે. અભિષેકે માત્ર પોતાના શાનદાર પ્રદર્શનથી જ નહીં, પરંતુ પોતાની અડીખમ મહેનત અને લગનથી પણ સાબિત કરી દીધું છે કે ભાવિ ભારતીય ક્રિકેટ સુરક્ષિત હાથોમાં છે
ઈંગ્લેન્ડ અને ભારતના ખેલાડીઓએ માન્ચેસ્ટર ટેસ્ટના રોમાંચક ડ્રો બાદ ICC રેન્કિંગમાં મોટી છલાંગ લગાવી છે. બીજી તરફ T20I બેટ્સમેનોની તાજેતરના રેન્કિંગમાં નંબર 1 બેટ્સમેન તરીકે એક નવા ખેલાડીની એન્ટ્રી થઈ છે. અત્યાર સુધી નંબર 1 T20 બેટ્સમેન ટ્રેવિસ હેડ હતો, જે હવે નંબર 2 પર પહોંચી ગયો છે.
અભિષેક શર્માનું પ્રારંભિક જીવન
અભિષેક શર્માનો જન્મ પંજાબના અમૃતસર શહેરમાં થયો હતો. બાળપણથી જ તેને ક્રિકેટ પ્રત્યે ખાસ લગાવ હતો. તેના પિતા પણ સ્થાનિક સ્તરે કોચ હતા. અભિષેકે પોતાના શાળાકીય દિવસોમાં જ ઘણા સ્થાનિક ટુર્નામેન્ટ જીત્યા હતા અને ઘણા રેકોર્ડ પણ બનાવ્યા હતા. તેણે પંજાબની રણજી ટીમમાં પોતાનું સ્થાન ખૂબ જ ઓછી ઉમરે મેળવ્યું હતું, જેનાથી ક્રિકેટ જગતમાં તેની ક્ષમતા સામે આવી ગઈ હતી.
અભિષેક શર્માએ ઈતિહાસ રચ્યો
વાસ્તવમાં ભારતના યુવા બેટ્સમેન અભિષેક શર્માએ T20I બેટ્સમેનોના રેન્કિંગમાં ઈતિહાસ રચી દીધો છે. તે વિરાટ કોહલી અને સૂર્યકુમાર યાદવ બાદ T20I માં નંબર 1 બનનાર ત્રીજો ભારતીય ખેલાડી બની ગયો છે.
અભિષેક શર્માની ઈન્ટરનેશનલ ક્રિકેટમાં ધમાકેદાર એન્ટ્રી
અભિષેક શર્માએ ગત વર્ષે જ ઈન્ટરનેશનલ ક્રિકેટમાં ધમાકેદાર એન્ટ્રી કરી હતી, જ્યારે તેણે ઝિમ્બાબ્વે સામે શાનદાર T20I સદી ફટકારી હતી. તાજેતરમાં દક્ષિણ આફ્રિકા અને ઈંગ્લેન્ડ સામે તેના શાનદાર પ્રદર્શનને કારણે 24 વર્ષીય બેટ્સમેને હેડને પાછળ છોડીને T20I રેન્કિંગમાં નંબર 1 સ્થાન હાંસલ કર્યું છે.
IPL થી લઈને આંતરરાષ્ટ્રીય ક્રિકેટ સુધીનું સફર
અભિષેક શર્માનો IPL સાથેનો જોડાણ ખાસ છે. તેણે IPL માં સનરાઈઝર્સ હૈદરાબાદ તરફથી રમીને પોતાની આગવી ઓળખ બનાવી. IPLમાં તેણે જે તોફાની બેટિંગ કરી છે, તે જોઈને પ્રશંસકો તેને ‘યંગ ધમાકેદાર બેટર’ કહેવા લાગ્યા. તેનું સ્ટ્રાઈક રેટ, બાઉન્ડરીઝ અને તેના ફિનીશિંગ શોટ્સ લોકપ્રિય થયા.
IPLમાં મળેલી સફળતાએ selectorsને તેની તરફ ધ્યાન ખેંચ્યું. થોડા સમયમાં જ તેને T20 આંતરરાષ્ટ્રીય ટીમમાં તક મળી અને તેણે આ તકને પણ સફળતામાં ફેરવી નાખી.
અભિષેક T20I રેન્કિંગમાં ટોપ પર પહોંચનાર ત્રીજો ભારતીય ખેલાડી બન્યો
ટ્રેવિસ હેડે ગત વર્ષે ICC મેન્સ T20 વર્લ્ડ કપ દરમિયાન સૂર્યકુમાર યાદવને પાછળ છોડીને નંબર 1 રેન્કિંગ હાંસલ કર્યું હતું અને ત્યારથી તે ટોપ પર હતો. પરંતુ તાજેતરમાં કેરેબિયન પ્રવાસ પર વેસ્ટ ઈન્ડિઝ સામે ઓસ્ટ્રેલિયાની T20 સીરિઝમાંથી બહાર રહેવાનો તેનો નિર્ણય તેના માટે મોંઘો સાબિત થયો અને અભિષેકને તેનો ફાયદો મળ્યો. આમ અભિષેક T20I રેન્કિંગમાં ટોપ પર પહોંચનાર ત્રીજો ભારતીય ખેલાડી બની ગયો છે.
હેડ પહેલા સૂર્યકુમાર યાદવે નંબર 1 રેન્કિંગ પર કબ્જો કર્યો હતો, જ્યારે વિરાટ કોહલી પ્રથમ ભારતીય પુરુષ ખેલાડી હતો, જે T20I ક્રિકેટમાં 2014થી 2017 દરમિયાન લાંબા સમય સુધી નંબર 1 રેન્કિંગ પર રહ્યો હતો.
ઈંગ્લેન્ડના અનુભવી બેટ્સમેન જો રુટે ટેસ્ટ બેટ્સમેનોના રેન્કિંગમાં પોતાની પકડ વધુ મજબૂત બનાવી છે. તેણે માન્ચેસ્ટરમાં 150 રનની શાનદાર ઈનિંગ રમી હતી, જેના કારણે તે હવે ઓસ્ટ્રેલિયાના દિગ્ગજ રિકી પોન્ટિંગને પાછળ છોડીને ટેસ્ટ ક્રિકેટમાં બીજા ક્રમનો સૌથી વધુ રન બનાવનાર ખેલાડી બની ગયો છે. બીજી તરફ જસપ્રીત બુમરાહ નંબર 1 ટેસ્ટ બોલરના સ્થાન પર કાયમ છે.
રિષભ પંતે ટોપ-10 રેન્કિંગમાં પોતાની સ્થિતિ મજબૂત બનાવી
ભારતના વિકેટકીપર રિષભ પંતે પણ ICC ટેસ્ટ બેટ્સમેનોના ટોપ-10 રેન્કિંગમાં પોતાની સ્થિતિ મજબૂત બનાવી છે. માન્ચેસ્ટર ટેસ્ટમાં ઈજા છતાં અડધી સદી ફટકારવાને કારણે, તે એક સ્થાન ઉપર આવીને સાતમા નંબર પર પહોંચી ગયો છે. બીજી તરફ યશસ્વી જયસ્વાલના રેન્કિંગમાં ઘટાડો થયો છે. તે ત્રણ સ્થાન નીચે સરકી ગયો છે અને હવે આઠમા નંબર પર પહોંચી ગયો છે
જાડેજાની રેન્કિંગમાં ઉછાળો
ભારતના અનુભવી ઓલરાઉન્ડર રવીન્દ્ર જાડેજાને માન્ચેસ્ટર ટેસ્ટની બીજી ઈનિંગમાં અણનમ સદી ફટકારવા બદલ મોટું ઇનામ મળ્યું છે. તેનું બેટિંગ રેન્કિંગ હવે તેમના કારકિર્દીનું સર્વોચ્ચ રેન્કિંગ બની ગયું છે. જાડેજા 5 સ્થાનની છલાંગ લગાવીને 29મા સ્થાન પર પહોંચી ગયો છે. બીજી તરફ ઈંગ્લેન્ડના કેપ્ટન બેન સ્ટોક્સના રેન્કિંગમાં પણ સુધારો થયો છે. તે 8 સ્થાન ઉપર ચઢીને 34માં નંબર પર પહોંચી ગયો છે.
